गुल्मी, १५ असार २०८२ – शिक्षा केवल अध्ययन र परीक्षा पास गर्नुमा सीमित रहँदैन, जब त्यो सम्मान र प्रेरणाको माध्यम बन्न पुग्छ, तब यसले समाजमा सकारात्मक ऊर्जा सृजना गर्छ । यही उद्देश्यका साथ कालिगण्डकी गाउँपालिका अन्तर्गत दभौखानी माध्यमिक विद्यालय र दुर्गा भवन माविले एसईई २०८१ मा उत्कृष्ट नतिजा हासिल गर्ने विद्यार्थीहरू र आफ्नो विषयमा शतप्रतिशत विद्यार्थी उत्तीर्ण गराउन सफल शिक्षकहरूलाई एक भव्य समारोहका बीच सम्मान गरेका छन् ।
कार्यक्रममा दभौखानी माध्यमिक विद्यालयका १० जना मेधावी विद्यार्थी र ३ जना समर्पित शिक्षकलाई विशेष सम्मान प्रदान गरिएको थियो । सम्मानित विद्यार्थीहरूमा खुस्बु राना, निरुता सुनार, विनिता दर्लामी, हिमाल परियार, टीना बुढा, पूर्णीमा विश्वकर्मा, प्रियंका श्रेष्ठ, नविन पाण्डे मगर र तिर्सना दर्लामी रहेका छन् । यिनीहरूले उच्च ग्रेडसहित एसईई परीक्षा उत्तीर्ण गरी विद्यालयको गौरव अभिवृद्धि गरेका छन् । त्यस्तैगरी, विषयगत रूपमा शत प्रतिशत विद्यार्थीलाई उत्तीर्ण गराउन सफल शिक्षकहरू पनि सम्मानित भए । अर्थशास्त्र तथा सामाजिक अध्ययन विषय अध्यापन गर्ने तेजप्रसाद काफ्ले, शिक्षा शास्त्र विषयका किसन थापा र नेपाली विषयका डिला त्रामु सम्मानित भएका हुन्, जसले आफ्नो अध्यापन मार्फत विद्यार्थीको भविष्य उज्वल बनाउन उल्लेखनीय योगदान पुर्याए ।
कार्यक्रम विद्यालय व्यवस्थापन समितिका अध्यक्ष चोक बहादुर श्रीस मौसमको अध्यक्षतामा सम्पन्न भएको थियो । कार्यक्रममा कालिगण्डकी गाउँपालिका वडा नं. २ का वडा अध्यक्ष रेशमराज न्यौपाने प्रमुख अतिथिका रूपमा सहभागी थिए । उनले आफ्नो मन्तव्यमा यस्ता सम्मान कार्यक्रमहरूले विद्यार्थी र शिक्षक दुवैमा आत्मविश्वास र प्रेरणा जगाउने बताएका थिए । छिमेकी विद्यालय भगवती मावि अर्बेनीका प्रधानाध्यापक रमेश न्यौपाने, देउराली माविका शिक्षक प्रेमनारायण पाण्डे, अभिभावक प्रितम राना र विद्यालयका प्रधानाध्यापक यमबहादुर सिंजालीले पनि शुभकामना मन्तव्य राख्दै सम्मानित विद्यार्थी र शिक्षकप्रति बधाई व्यक्त गरे । शिक्षा क्षेत्रमा यस्तो सकारात्मक प्रयासले गाउँपालिकाको समग्र शैक्षिक स्तरमा समेत सुधार आउने विश्वास व्यक्त गरे ।
सम्मान कार्यक्रममा सहभागी वक्ताहरूले विद्यार्थीहरूको मेहेनत, शिक्षकहरूको समर्पण, र अभिभावकहरूको समर्थनलाई समान रूपमा सराहना गरे । यस्ता कार्यक्रमले आगामी पुस्तालाई मेहनत, लगनशीलता, र शैक्षिक इमानदारीप्रति प्रतिबद्ध बनाउने धारणा उनीहरूले प्रस्तुत गरेका थिए । शिक्षालाई केवल प्रमाणपत्र प्राप्तिको साधन नभई समाज रूपान्तरणको माध्यमको रूपमा बुझ्ने सोचको विकास गर्न यस्ता कार्यक्रमले ठूलो योगदान पुर्याउने वक्ताहरूको विश्वास थियो । यस किसिमको सम्मान कार्यक्रमले विद्यार्थीलाई अझ कडा मिहिनेत गर्न, शिक्षकलाई अझ समर्पित बन्न र विद्यालय व्यवस्थापनलाई अझ उत्तरदायी र सक्षम रूपमा अघि बढ्न प्रेरित गर्छ । यस्तो सकारात्मक पहलले विद्यालय मात्र होइन, सम्पूर्ण गाउँपालिका र अन्ततः जिल्ला र राष्ट्रकै शैक्षिक प्रतिष्ठा उचो बनाउन योगदान पुर्याउँछ ।
यस अवसरमा विद्यालयका व्यवस्थापन समिति अध्यक्ष चोक बहादुर श्रीस मौसमले भने “विद्यालयको सफलतामा विद्यार्थी, शिक्षक, अभिभावक र समाज सबैको समान भूमिका हुन्छ । आज हामी सबैको सामूहिक प्रयासको फलस्वरूप यो उत्कृष्ट नतिजा ल्याउन सफल भएकाहौं । निरन्तर परिश्रम, अनुशासन र लक्ष्यप्रतिको निष्ठका कारण प्राप्त यो उपलब्धिले विद्यालय, अभिभावक तथा सम्पूर्ण समुदायको शिर गर्वले उँचो भएको महशुस गरेका छौं ।”
दभौखानी र दुर्गा भवन माविको यो कदमले शिक्षा क्षेत्रलाई सही दिशा दिने मात्र होइन, समग्र समाजमा सकारात्मक परिवर्तन ल्याउने आशा गरिएको छ । यसले शैक्षिक उत्कृष्टताको मूल्यांकन मात्र होइन, मेहनत, निष्ठा र समर्पणप्रति समाजले दिने सम्मान पनि स्पष्ट रूपमा प्रस्तुत गरेको छ । यसप्रकारका सम्मान समारोहहरूलाई निरन्तरता दिँदै, विद्यार्थी र शिक्षकको मनोबल अझ उच्च राख्न आवश्यक छ, ताकि शिक्षा साँचो अर्थमा राष्ट्र निर्माणको आधार बन्न सकोस् ।
