काठमाडौं २७ साउन २०८३, उद्योग तथा वाणिज्य र श्रम तथा उपभोक्ता हित समितिले कालोबजारी गर्ने पेट्रोलपम्पतथा ग्यास डिलरको इजाजत खारेज गर्न सरकारलाई निर्देशन दिएको छ ।
बुधबार बसेको समितिको बैठकले यस्तो निर्देशन दिएको हो। यस्तै, समितिले अत्यावश्यक दैनिक खाद्यवस्तुको सहज आपूर्ति व्यवस्थापन गर्न पनि सरकारलाई भनेको छ । समिति सभापति रहबर अन्सारीले कालोबजारी गर्नेलाई कानुनी दायरामा ल्याउन निर्देशन दिए ।
सभापति अन्सारीले पेट्रोलियम पदार्थसम्बन्धी ऐन तथा कालोबजारी नियन्त्रणसम्बन्धी विधेयक तयार गर्न आवश्यक तयारी अघि बढाउन उद्योग, वाणिज्य तथा आपूर्ति मन्त्रालय र मातहतका निकायलाई निर्देशन दिएका छन् ।
उनले होटल तथा रेस्टुरेन्टमा पाम तेलमा रासायनिक पदार्थ मिसावट गर्ने प्रवृत्ति देखिएको भन्दै अनुगमनलाई प्रभावकारी बनाउँदै कारबाही गर्न पनि निर्देशन दिएका छन् । रासस
