Khoj Sansar

बुटवल २५ साउन २०८३, आदिवासी जनजाति उत्थान राष्ट्रिय प्रतिष्ठानका निवर्तमान अध्यक्ष रेशम गुरुङले प्रतिष्ठान खारेज गर्ने नभई अझ सशक्त बनाउनुपर्नेमा जोड दिए। ३२ औँ विश्व आदिवासी दिवसको अवसरमा आइतबार बुटवलमा आयोजित कार्यक्रममा बोल्दै गुरुङले प्रतिष्ठान खारेज गर्ने प्रयास भए देशभरका आदिवासी जनजाति सडकमा उत्रिने चेतावनी दिए। वर्तमान सरकारले आदिवासी जनजाति उत्थान राष्ट्रिय प्रतिष्ठान खारेज गर्न लागेको भन्दै उनले त्यसको विरोध गरे। प्रतिष्ठान खारेज गर्ने दुष्प्रयास गरिए सम्पूर्ण आदिवासी जनजाति एकजुट भएर आन्दोलनमा उत्रिने उनले बताए। देशभरका आदिवासी जनजाति सडकमा आए सरकारले समेत त्यसलाई थाम्न नसक्ने उनको भनाइ थियो। गुरुङले संघीय लोकतान्त्रिक गणतन्त्र स्थापना भएपछि मात्रै आदिवासी जनजातिका अधिकार लिपिबद्ध भएको स्मरण गरे। संघीयता नागरिकलाई सेवा र सुविधा दिने व्यवस्था मात्र नभई अधिकार सुनिश्चित गर्ने महत्वपूर्ण माध्यम भएको उनले बताए। “सेवा र सुविधा विकेन्द्रीकरणको माध्यमबाट दिन सकिन्छ। तर अधिकार विकेन्द्रीकरणको माध्यमबाट मात्र दिन सकिँदैन,” उनले भने, “त्यसैले संघीयताको महत्वलाई हामीले जोगाउनुपर्छ र अहिलेको सरकारलाई पनि यो कुरा आदिवासी जनजातिले बुझाउनुपर्छ।” कार्यक्रममा बुटवल उपमहानगरपालिकाका प्रमुख खेलराज पाण्डेले बुटवललाई सांस्कृतिक सहरका रूपमा विकास गर्ने योजना रहेको बताए। सबै जातजाति, भाषाभाषी, धर्म र संस्कृतिको साझा थलोका रूपमा बुटवललाई विकास गर्ने गरी नगरपालिकाले बजेट छुट्याएको उनले जानकारी दिए। बुटवल उपमहानगरपालिकाले आदिवासी जनजातिका संस्कार र संस्कृतिलाई सम्पत्तिका रूपमा लिएर संरक्षण तथा प्रवर्द्धनको काम गरिरहेको प्रमुख पाण्डेले…